Xerontocracia
Un breve apunte para chamar a atención sobre unha notiña de Europa Press publicada no único diario de pago en galego realmente existente. O vindeiro 27 de maio, preséntanse 21 alcaldes que levan no sitio dende as primeiras eleccións municipais, en 1979, ou antes. A metade están en Ourense, só tres non son do PP e só tres son mulleres. Sete deles xa eran alcaldes con Franco.
Porén, 21 concellos de 315 que hai en Galicia non son… demasiados. Varios dos rexedores máis veteranos, como o de Cervantes, do que falaba no meu último desbarre, fixeron as maletas, ben pollos achaques ben polo cambio da situación política (porque xa non está Fraga, digo). Un pouco máis e nos libramos do mito da xerontocracia.
Qué queres que che diga, dende a miña máis tenra infancia levo co mesmo alcalde, e creo que pouco máis ten de 50 anos. O poder atrae moito, e é bastante difícil deixalo. O que si que non chego a entender é como están habilitados a exercer como alcaldes aqueles que os tiveron na época franquista. Nunca entendín o pouco que importou neste país que apoiases unha estrutura ditatorial. Non me entra na cabeza. A outros, ter vencellos cos nazis, significa unha nódoa na súa carreira. Que lei da memoria histórica tan desaproveitada.